Gasteizek dirulaguntzetatik haratago auzoen birsorkuntza bultzatzeko laborategia garatuko du CONAMA Local 2025en
Vitoria-Gasteiz CONAMA Local Ingurumenaren Biltzar Nazionalaren hurrengo edizioan izango da. Egitasmoa abenduaren 2tik 4ra bitarte egingo da Viladecans herrian (Bartzelona). Foro hori sendotu egin da urteen poderioz, eta hiri-jasangarritasunarekin konprometitutako administrazio, enpresa eta erakundeentzako lanerako eta topaketarako gune nagusietako bat bihurtu da.
Esparru horretan eta Europako Hirien Misioaren Enabling Massive Change for Climate-neutral Cities (URBANEW EMC3) proiektuaren barruan, Arabako hiriburuak izango duen presentziari dagokionez, birgaitze energetikoaren finantzaketari buruzko Berrikuntza Laborategia bihar antolatuko du biltzarrean.
Saioak, “Etorkizunari begira: nola aktibatu auzoak biziberritzeko bolada dirulaguntzetatik harago” izenekoak, Espainiako zazpi Hiri Misioetako ordezkariak bilduko ditu (Gasteiz, Bartzelona, Madril, Sevilla, Valentzia, Valladolid eta Zaragoza), finantza-erakundeekin, beste administrazio publiko batzuekin eta birgaitze-ekosistemako eragileekin batera. Helburua da baliabide publikoak eta pribatuak modu konbinatuan mobilizatzea ahalbidetuko duten irtenbideak diseinatzea, gizarte-ekitatea bermatzea eta birgaitze-prozesuen jarraitutasuna ziurtatzea, Europako funtsetatik harago.
Laborategia KiteLab metodologian oinarrituko da. Metodologia hori SustainableStartup&Co erakundeak, URBANEW EMC3 partzuergoko bazkideak, garatu du, eta denbora errealean egindako lankidetza bultzatzen du. Dinamika horri esker, birgaitze energetikoa auzo eta hiri mailan eskalatzeko finantza-mekanismoak eta -egiturak aztertu ahal izango dira.
Laborategian, eta Misio hiri guztiek eta beste eragile batzuek elkarrekin sortutako eta baliozkotutako aurretiazko diagnostikotik abiatuta, parte-hartzaileek aurreko faseetan planteatutako erronkei irtenbidea emango dieten tresna eta egitura berrien bideragarritasuna aztertuko dute.
Laborategiak gure hirietako ingurune eraikiaren birgaitze masiborantz aurrera egitea bultzatuko duten soluzioak aurkitu nahi ditu, Europako deskarbonizazioko helburuak betetzen laguntzeko.
URBANEW EMC3 proiektuak jarraipena ematen dio Espainiako URBANEW proiektu pilotuan garatutako lanari, irismena proiektu pilotuaren eskalatik hiri mailako estrategiaraino hedatuz. Laborategi honekin, partzuergoak neutraltasun klimatikorako trantsizioa bizkortzeko konpromisoa indartuko du, soluzio zehatzen, kolaboratiboen eta eskalagarrien bidez.
