López Campos convida a achegarse a Maruja Mallo desde a tradición alfombrista
O conselleiro de Cultura, Lingua e Xuventude, José López Campos, convidou a todos os galegos a achegarse ao legado de Maruja Mallo, unha figura referente da vangarda en Galicia, a través da tradición e a artesanía galega. Fíxoo no Museo Massó de Bueu, onde xa se pode visitar a alfombra dedicada á artista viveirense que foi elaborada pola Asociación Cultural Cunchas e Flores de Bueu con motivo da inauguración da mostra Maruja Mallo. Máscara y compás no Museo Nacional Centro de Arte Reina Sofía de Madrid, o pasado 7 de outubro.
O representante de Cultura do Goberno galego destacou “a oportunidade para difundir a tradición alfombrista e o traballo dos nosos artesáns rendendo homenaxe ao legado dunha creadora transgresora ligada a esta sociedade mariñeira”. Neste senso, López Campos lembrou que a pintora viveirense realizou un caderno de apuntes en Bueu nos primeiros días de xullo de 1936, interrompido con motivo do Golpe de Estado que a obrigou a fuxir do país. O caderno recolle toda unha serie de detalles de xente e da actividade pesqueira, das praias e vivendas mariñeiras executados en Beluso e Bueu, algúns dos cales foron integrados en obras que forman parte da serie pictórica La Religión del Trabajo (1936-1939).
Tal e como explicou o conselleiro, a peza, que conta cunha superficie aproximada de 12×2 metros e reproduce fragmentos de obras da autora, está elaborada a partir de materiais como cunhas de mexillón, ameixa ou lapas, así como sementes ou follas. “Desde as institucións debemos tender a man a estas iniciativas que fan fincapé na herdanza dunha figura senlleira da nosa comunidade”, explicou o conselleiro, que aproveitou para felicitar o traballo dos artesáns da Asociación Cultural Cunchas e Flores.
Cómpre lembrar que a creación da asociación de Bueu estivo instalada na zona de acceso ao Museo Nacional Centro de Arte Reina Sofía durante o acto de apertura desta exposición que supón a maior retrospectiva realizada ata a data arredor da figura desta creadora. A exposición, que reúne 90 obras entre as que se atopan pinturas, debuxos, escritos, documentos e vídeos, pode visitarse en Madrid ata o 16 de marzo de 2026 dándolle continuidade ao proxecto expositivo que se puido visitar ata o 14 de setembro no Centro Botín de Santander.
