Ondas de Jazzek 20. urteurrena ospatuko du, legatua, aniztasuna eta sonoritate berriak batzen dituen programazioarekin

• Sei kontzertu izango dira abenduaren 9tik maiatzaren 26ra: Vocal Groove & Faith Collective, Juanma Montoya, Astrid Canales, Euskal Bostkote eta Luis Aramburu Udal Musika Eskolako eta Jesus Guridi Kontserbatorioko Big Bandak

Ondas de Jazz (Jazz Uhinak) zikloak hogei urte bete ditu eta jazzaren iragana, oraina eta etorkizuna zeharkatzen dituen edizio bereziarekin ospatuko du tradizioa, berrikuntza, pedagogia eta konpromiso soziala uztartzen dituzten sei kontzerturen bidez. Bi hamarkadatan hirian erreferente kultural gisa finkatu ondoren, zikloak Euskadiko jazzaren interprete gazteak eta funtsezko artistak biltzen dituen programazioa aurkeztu du.

Denboraldia 2025eko abenduaren 9an hasiko da, Vocal Groove & Faith Collectiverekin. Abeslari profesionalek eta zaleek osatzen duten abesbatza da, eta musikaren ahalmen sendatzailea eta dimentsio komunitarioa aldarrikatzen dute. Donald Lawrenceren How Sweet The Sound lehiaketako irabazleek (Europako gospeleko abesbatza onenari emandako saria jaso zuten Royal Albert Hallen) generoko klasikoak eta migrazioa, itxaropena eta elkartasuna bezalako gaiak jorratzen dituzten konposizio originalak bateratzen dituen errepertorioa aurkeztuko dute (sarrera: 10 €).

2026ko urtarrilaren 20an, Juanma Montoya gitarra-jotzailea, Nathy Peluso, Javi Medina edo Rels B bezalako artisten ohiko kolaboratzailea, birtuosismoa, konplexutasun harmonikoa eta modernitatea uztartzen dituen neo-flamenko garaikidearen proposamenarekin iritsiko da. Lehen mailako banda batek lagunduta, Montoyak tradizioak eta abangoardiak naturaltasunez hitz egiten duten kontzertua eskainiko du (sarrera: 10 €).

2026ko otsailaren 24ko eta martxoaren 10eko kontzertuek zikloaren dimentsio hezitzailea eta jazzak hirian duen etorkizuna jorratuko dituzte. Luis Aramburu Udal Musika Eskolako eta Jesus Guridi Kontserbatorioko Big Bandek ikasturtean zehar egindako lana erakutsiko dute swinga, errepertorio klasikoa eta pieza modernoak nahasten dituen programarekin (sarrera: 2 €). Hilabete geroago, haien jazz comboek kontzertu intimo eta sortzailearen protagonista izango dira. Bertan, ikasleek beraiek aukeratu eta moldatuko dituzte lanak, inprobisazioa, elkarrizketa musikala eta adierazpen askatasuna sustatuz (sarrera: 2 €).

2026ko apirilaren 14an, zikloak Astrid Canales, Espainiako neo-soulean gorantz egiten ari den ahotsetako bat, aurkeztuko du. Bere musikak sofistikazio jazzistikoa eta gaur egungo R&B-aren berehalakotasuna eta mezu sozial indartsua uztartzen ditu, eta batez ere publiko gaztearekin konektatzen du (sarrera: 10 €).

Programazioa 2026ko maiatzaren 26an amaituko da, Euskal Bostkoterekin. 20. urteurrenerako espresuki sortutako boskotea da eta Euskadiko jazzaren funtsezko bost pertsonak osatzen dute: Iñigo Ruiz de Gordejuela, Borja Barrueta, Ander García, Asier Ardaiz eta Jean Marie Ecay. Hainbat urtez Estatuko eta nazioarteko agertokietan ibilbide independenteak egin ondoren, konposizio propioak interpretatzeko elkartu dira (sarrera: 10 €).

Sarrerak eta abonamenduak (35 €) salgai daude dagoeneko. Informazio guztia Ondas de Jazz zikloaren webgunean.

20 urte jazza eskaintzen

Oroitzapenezko edizio honekin, Ondas de Jazzek berretsi egin du aniztasun estilistikoarekiko konpromisoa, talentu sortzaileari emandako bultzada eta komunitatearen sorkuntza, eta Gasteizen jazza hedatzeko eta garatzeko ezinbesteko espazio gisa sendotu da.

Bi hamarkada hauetan, Jesus Guridi Kontserbatoriotik 500 musikari baino gehiago igaro dira eta zikloaren programazioa osatu dute. Horietatik erdiak, gutxi gorabehera, Euskal Autonomia Erkidegokoak izan dira. Apustu horri esker, Ondas de Jazz zikloak Euskadiko Musikaren Saria jaso zuen 2017an. Saria Musika Bulegoa Elkarteak emandakoa da.

Gainera, zabalkunde lan horrekin bat etorriz, iazko jaialdian 230 informazio sortu ziren irrati, prentsa eta sare sozialen artean. Ahalegin informatibo horri esker, 10,5 milioi ikusleko audientzia potentziala lortu zen. Horrek, datu ekonomikotan, 190.000 euro inguruko inpaktua esan nahi du, Hallon auditoretza-enpresak emandako datuen arabera.