Enrique Eguren haur-parkea eraberritzen hasi dira, irisgarriagoa eta modernoagoa izan dadin
- 109.000 euroko inbertsioarekin, obrek aukera emango dute adin desberdinetara egokitutako joko berriak instalatzeko eta espazioaren segurtasuna hobetzeko
Beatriz Artolazabalen adierazpenak (mp3)
Espazio Publikoaren eta Auzoen Saila Enrique Eguren kalean dagoen haur-parkea birmoldatzen hasi da gaur. Proiektuak egungo ekipamendua kentzea, denboraren poderioz hondatuta baitago, eta horren ordez joko seguruagoak, modernoagoak eta inklusiboagoak jartzea aurrez ikusten du.
Esku-hartzeak 136 metro koadroko azalera du, eta honako hauek barne hartzen ditu: adin desberdinetara egokitutako jolasak, segurtasuneko kautxu jarraituzko zoruak eta mugikortasun murriztua edo dibertsitate sentsoriala duten elementu irisgarriak.
Lanek 109.000 euroko aurrekontua izango dute, eta lau hilabeteko epea, haurrentzako eta inguruko familientzako espazio erakargarriagoa, irisgarriagoa eta seguruagoa eskaintzeko.
“Enrique Eguren kaleko haur-parkea berritzea jolasa, bizikidetza eta inklusioa sustatuko duten kalitatezko espazio publikoak eskaintzeko dugun konpromisoaren beste adibide bat da”, nabarmendu du Beatriz Artolazabalek, Espazio Publikoaren eta Auzoen zinegotziak. “Haur guztiek, haien gaitasunak edozein izanda ere, aisialdiaz berdintasun- eta segurtasun-baldintzatan gozatu ahal izatea nahi dugu”.
Artolazabalek azpimarratu du jarduera hori auzoetako haur-parkeak modernizatzeko udal-estrategiaren parte dela. “Haurrak ingurune seguru eta alaietan haztea nahi dugu, eta horrelako proiektuek adin guztietarako pentsatuta eta zainduta dauden auzoekiko dugun konpromisoa indartzen dute”.
