(Argazkiekin eguneratuta) Gasteizek hiru gune ilunetan segurtasuna indartuko du LED argi berriekin
- Jarduketak Aldabeko barruko aparkalekuan, Zurrupitietako bizikleta-bidean eta Zuhatzuko oinezkoentzako bidean egingo dira
- Milioi erdi euro baino gehiago inbertitu dira argiteria publikoan azken lau urteetan genero-ikuspegia aintzat hartuta
Tokiko Gobernu Batzordeak bihar onartuko du kontratazio-espedientea hiriko hiru puntutan argiztapen publikoa berritzeko eta handitzeko genero-ikuspegia kontuan hartuta: Aldabe Gizarte Etxearen barruko aparkalekua, Zurrupitieta kaleko bizikleta-bidea eta Zuhatzu eta Zabalgana lotzen dituen oinezkoentzako bidea. Herritarrek eremu ilun edo ikuspen gutxiko eremutzat jotako inguruneetan segurtasuna eta erosotasun-pertzepzioa hobetzeko Udalak egindako apustuarekin lotuta dago proiektua.
Azken lau urteotan, Udalak milioi erdi euro baino gehiago inbertitu ditu argiztapen publikoa genero-ikuspegiarekin hobetzeko jarduketetan. Hala, orain gutxi era horretako lanak egin dituzte hainbat eremutan: Olarizuko Lorategi Botanikoan, Abetxukun, Gamarran edo Valentin Foronda zidorrean. Berrikuntza-lan horiei esker, itzalguneak murriztu dira, instalazio zaharrak modernizatu dira eta segurtasun-sentsazioa indartu da oinezkoentzako eta txirrindularientzako ibilbideetan.
Jarduketa berriak genero-ikuspegiaren irizpideak jasotzen ditu, emakumeek eta adinekoek gaueko ordutegietan ez-segurutzat jotzen dituzten ibilbideak lehenetsiz. Beatriz Artolazabal Espazio Publikoaren eta Auzoen zinegotziaren arabera, “argiztapen ona oinarrizko baldintza da pertsona guztiak lasaitasunez mugi daitezen. Eremu batzuetan, argirik ezak segurtasunik eza sortzen du, eta esku-hartze hauen bidez, erantzun argia ematen diegu egoera horiei”.
Artolazabalek gaineratu du Udala lanean ari dela Herritarren Postontziaren bidez eskaera gehien jaso zituzten puntuetan eta azterketa teknikoak argiztapen defizitak zeudela baieztatzen zituen puntuetan. “Garai bateko argien ordez, LED teknologia erabiltzen dugu, eta gaur egun guztiz ilunak diren tarteetan argitasuna handitzen dugu. Gure helburua da itzalguneak kentzea eta segurtasuna indartzea eguneroko ibilbideetan, oinezkoentzat zein txirrindularientzat”, azpimarratu du.
Proiektuak aurrez ikusten du 16 LED argi instalatzea Aldabe barruko aparkalekuan, 21 argi Zurrupitietako bizikleta-bidean eta anbar tonalitateko 20 argi jartzea Zuhatzu eta Zabalgana arteko oinezkoen bidexkan.
Aurrekontua 149.993,68 eurokoa da guztira, eta gauzatzeko epea, aldiz, bederatzi hilabetekoa. “Aurrera jarraitzen dugu hiri seguruagoa, atseginagoa eta hobeto argiztatuta dagoena eraikitzeko bidean, edonor beldurrik gabe eta konfiantza osoz ibil dadin”, adierazi du alkateordeak.
Agorespace Lakua eta hilerria
Biharko Tokiko Gobernu Batzordean, halaber, Iruñea, Baiona, Wellingtongo Dukea eta Lizarra kaleen arteko parkean dagoen agorespace gunea (galeoi pirata izeneko haurrentzako jolasaren ondoan) modu integralean berritzeko espedientea onartuko da.
Jarduketa horri esker, futbol-pista erabat modernizatu ahal izango da. Lakua auzoan gehien erabiltzen den kirol-espazioetako bat da eta soropil artifizialaren ordez azken belaunaldiko modelo bat jarriko da, ate berriak instalatuko dira eta inguruko zurezko elementuak konponduko dira. Guztizko aurrekontua 198.269,67 eurokoa izango da.
Era berean, Tokiko Gobernu Batzordeak argi berdea emango dio El Salvador hilerriko 254. etxadia eraberritzeko kontratazio-espedienteari. Esku-hartze horri esker, nitxoen hiru eraikinak konpondu eta urbanizazio perimetrala hobetu ahal izango da.
Proiektuak 340.594 euroko balioa du, eta fatxadetako, estalkietako, euri-uren sareko eta drainatze-sareko lanak barne hartzen ditu, baita zuhaitzak babesteko plan espezifikoa ere. Urteek, hezetasunak eta sustraien afekzioak eragindako kalteak konpontzea da helburua, hiriarentzat hain esanguratsua den hileta-espazio horren mantentze egokia bermatuz.
