Olarizuko labirintoak ateak ireki ditu eta, horri esker, hiriak beste erakargune berde handi bat izango du

• Ia 4.000 metro karratu ditu, eta 6.000 xarma, espezie autoktonoa, eta bere dentsitatea eta erresistentzia direla eta labirintoak eta heskaiak sortzeko Europan asko erabiltzen dena, baino gehiagok osatu dute
• Familia-aisialdirako eta hezkuntzarako pentsatua dago, Euskadin ez dago parekorik eta jasangarritasun arloko Gasteizko erreferente bihurtuko da

Beatriz Artolazabalen adierazpenak (mp3)

Vitoria-Gasteizek Olarizuko Landare Labirintoa ireki du. Olarizuko Lorategi Botanikoa osatzen duen espazio natural handiko elementu berria eta hiriko benetako harribitxi berdea izango da. Inaugurazio honekin, Udalak amaiera eman dio familia aisialdirako, ikaskuntzarako eta naturarekiko bizikidetzarako diseinatutako proiektuari. Gainera, oso proiektu desiratua izan da hasieratik.

Irekiera ekitaldian Maider Etxebarria alkateak, Beatriz Artolazabal alkateordeak eta Eusko Jaurlaritzako Turismo eta Merkataritza sailburuorde Jakes Agirrezabalek hartu dute parte.

Bere hitzaldian, Maider Etxebarria alkateak adierazi duenez, labirinto hori “Olarizuko Lorategi Botanikoaren elementu bultzatzaile eta Gasteiz bisitatzen duten pertsonei zuzendutako erakargune gehigarri gisa sortu da. Gainera, hiri berde, bizi eta erakargarri gisa aurrera egiten jarraitzeko bidea ematen digu, naturaren erdian aisialdiaz gozatzeko aukera ematen diguten baliabideekin”. Gaineratu duenez, “bideratzen dugun proiektu berde berri bakoitza udal-gobernutik bultzatzen dugun eta Gasteiz gizatiarragoa eta jasangarriagoa eratzeko helburu horretan emandako aurrerapausoa da”.

Labirintoak ia 4.000 metro karratuko azalera du, eta 6.000 xarma baino gehiagok osatzen dute. Espezie autoktonoa da, urtaroekin batera aldatzen dena, berde bizitik urre kolorera eta gero kobre kolorera, eta dentsitateari eusten diona urte osoan zehar. Gainera, Europan historikoki heskaiak eta labirintoak sortzeko gehien erabili izan den espezieetako bat da, bere erresistentziagatik, inausketaren ondoren forma mantentzeko duen gaitasunagatik eta urtean zehar bere edertasuna aldatu egiten delako. Denborarekin, heskaiak 1,70 metroko altuera izango du, benetako landare-horma gisa finkatu arte.

Landareekin egindako ibilbidea, gainera, CO₂ren hustubide naturala eta hegazti, intsektu eta animalia txikientzako babeslekua ere izango da, parkearen ekosistema indartuz. Sistema osoa jasangarritasuneko irizpideekin diseinatu da: tantakako ureztaketa, material naturalak eta iragazkorrak, eta mantentze-lan arduratsua, produktu kimikorik gabea.

Multzo osoa osatzeko, erdialdean haritz bat, egoteko eremuak mugatzen dituzten altzifreak, sartzeko plazatxoan itzala emango duten masustondoak eta ura Lorategi Botanikoaren kanpoko aintzirara bideratzen duen drainatze-sistema naturala daude.

“Ez da jolas hutsa: bertan galduta ibiltzeko, gelditzeko, begiratzeko eta natura berriz aurkitzeko gonbidapena da”, nabarmendu du alkateorde Beatriz Artolazabalek. “Gaurtik aurrera, Gasteizko bizilagunok birika berde berri bat dugu. Gozatzeko, ikasteko, jolasteko eta hausnartzeko lekua. Hiri honen nortasuna indartzen duen espazioa da eta natura eta bizikidetza beti eskutik helduta beti elkartuta izango dira”.

Labirintoak “Blanca Catalán de Ocón” izena du, emakumezko lehen botikari espainiarraren omenez (bere bizitzako azken urteak Gasteizen eman zituen). Emakume aitzindaria izan zen, ikertzailea eta landareen zalea, oso gutxik egin zezaketenean bidea ireki zuena. Bere izena naturako txoko honi lotuta geratuko da gaurtik aurrera.

Proiektua herritarren parte-hartzearen erakusgarri ere bada. Olarizuko bizilagunen ekarpenen ondoren, jatorrizko diseinua aldatu egin zen, labirintoa etxebizitzetatik urruntzeko, sarbide bat egin beharrean hiru sortzeko, zuhaitzez inguratutako plaza txiki bat gehitzeko eta Lorategi Botanikoarekiko ikuspena eta oinezkoentzako lotura hobetzeko.

“Elkarrizketari eta lankidetzari esker, proiektu hobea dugu gaur egun, herritarren partaidetza handiagoa duena eta herritarrek gehiago estimatzen dutena”, aitortu du Artolazabalek, eta eskerrak eman nahi izan dizkie “IGIri eta diseinu- eta gauzatze-lanetan parte hartu duten pertsona guztiei” egindako lanagatik eta inplikazioagatik.

Horrela, Olarizuko Landare Labirintoa aisialdi jasangarriaren eta ingurumen-hezkuntzaren erreferente berri bihurtu da Euskadin, eta Gasteizek (hiri berdea, zalantzarik gabe) bertako gune naturalak bisitatzeko eta horiez gozatzeko beste arrazoi bat gehitu du.

Susperraldi, Eraldaketa eta Erresilientzia Planean jasota dago proiektua eta Next Generation EU funtsetatik iritsitako Europako finantzaketa jaso du. Aurrekontua 474.742 eurokoa izango da.