“Hiriak x Natura” jardunaldiak antolatu dituzte Gasteizen, Herrandarren kalea eraldatzeko proiektuari amaiera emateko
- Azpiegitura berdeetan espezializatutako administrazio, unibertsitate eta erakundeetako teknikariek eta ordezkariek hiri-birnaturalizazioaren inguruko esperientziak partekatuko dituzte
Vitoria-Gasteizek “Hiriak x Natura” jardunaldiak egingo ditu gaur, Ingurumen Gaietarako Ikastegiak, IGI, antolatuta. Topaketa horretan, azpiegitura berdearekin eta hiri-plangintzarekin lotutako hainbat administrazio publikotako, unibertsitatetako, ikerketa-zentrotako, enpresa eta erakundeetako teknikariak bilduko dira.
Hitzordua Gasteizko Udalak bultzatutako Herranden Kale Berria proiektuaren barruan kokatzen da (hiriko bide-ardatz nagusietako bat korridore berde handi bihurtzeko helburua duen proiektua). Jarduketa horren obrak datozen asteetan amaituko dira, eta Arabako hiriburua duela hamarkada batzuetatik garatzen ari den hiri-birnaturalizazioaren estrategiarekin lotuta daude.
Beatriz Artolazabal alkateorde eta Espazio Publikoaren eta Auzoen zinegotziak inauguratu du jardunaldia, eta azpimarratu duenez, “proiektu honek naturak espazio publikoan betetzen duen zeregina birpentsatzera eta hiri osasungarriago eta erresilienteago baterantz aurrera egiten jarraitzera gonbidatzen gaitu”.
Bere hitzaldian, Artolazabalek gogorarazi du “Herrandarren Kale Berriak Gasteiz hiribidearen eraldaketarekin hasitako bideari jarraitzen diola: asfalto gutxiago, natura gehiago, oinez ibiltzeko eta elkarrekin bizitzeko espazio gehiago. Ekimen honen bidez, hiri-natura hiri-politiken erdigunean jartzen dugu berriro, klima-aldaketaren aurkako tresna gisa ez ezik, ongizatearen, osasunaren eta gizarte-kohesioaren iturri gisa”.
Herrandarren Berria proiektuak Trantsizio Ekologikorako eta Erronka Demografikorako Ministerioaren mendeko Bioaniztasuna Fundazioaren laguntza jaso du Europar Batasuneko Next Generation EU funtsekin finantzatutako Susperraldi, Eraldaketa eta Erresilientzia Planaren baitan.
Jardunaldian, Herrandarren kalean egindako eraldaketa aurkezteaz gain, Udalak 2014an onartutako Hiri Azpiegitura Berdearen Estrategiari helduko zaio, eta azken urteotan bultzatutako hiri-birnaturalizazioko hainbat proiektutara bisita teknikoak egingo dira, hala nola Kanpokale Berria, Aldabe, Memorialaren ingurua, Haurren Auzoa edo Martin Ttipia plaza.
Gonbidatutako hirien artean Bartzelona eta Bordele daude, eta egindako hiri-egokitzapeneko eta naturalizazioko esperientzia propioak azalduko dituzte.
“Gure hiriak biztanle bakoitzeko 42 metro karratu berdegune ditu, Estatuko zifrarik altuenetakoa, eta edozein pertsona sar daiteke berdegune batera oinez hiru minutu baino gutxiagoan”, nabarmendu du Artolazabalek. “Ikuspegi politikoaren, plangintza teknikoaren eta adostasun sozialaren arteko konbinazio horrek ahalbidetzen digu Gasteiz naturalago, osasungarriago eta gizatiarrago baterantz aurrera egitea”.
