Gasteizko Udalak Judimendiko parkeko lanak partzialki geldiarazi du, aztarna arkeologikoak aurkitu ondoren
Vitoria-Gasteizko Udalak Judimendiko parkea berritzeko lanak partzialki geldiarazi ditu, haur-jolas berriak instalatzeko lanetan aztarna arkeologikoak aurkitu ondoren.
Lanak abuztuaren amaieran hasi zituzten berdegune hori berritzeko asmoz, eta haurrentzako jolas berriak, tirolina bat eta txakur-gune bat jarriko dituzte. Uneotan, parkeko tabernaren ondoan tirolina, agility jolasak eta beste elementu batzuk jartzeko lanak egiten ari ziren.
Astelehenean, tabernatik urrunen dagoen gunean lanean ari ziren langileek hezurrak aurkitu zituzten indusketa-lanetan. Berehala, Udalak kasu horietarako aurreikusitako protokoloa aktibatu zuen, eta Arabako Foru Aldundiko Arkeologia Zerbitzuarekin harremanetan jarri zen.
Beatriz Artolazabal Espazio Publikoaren eta Auzoen zinegotziak gaur goizean egindako Batzordean jakinarazi duenez, Aldundiko teknikariak informazioa biltzen ari dira gorpuzkien jatorri zehatza zehazteko.
Artolazabalek adierazi duenez, prebentzio-neurri gisa, eremua hesitu eta olana batez estali da, hondakinak babesteko eta segurtasuna bermatzeko, indusketa- eta azterketa-lanekin jarraitzen duten bitartean. “Parkearen alde horretan, lanak geldirik egongo dira aurkikuntzen irismena eta izaera ezagutu arte. Gainerako eremuetan, lanek normaltasunez jarraitzen dute”, gaineratu du.
Udalak Arabako Foru Aldundiarekin koordinatuta jarraitzen du, teknikari espezialistek emandako urratsak jarraitzeko eta Arkeologia Zerbitzuaren jarraibideen arabera jarduteko.
