Gasteizko Udalak 250.000 euro bideratuko ditu hiriko hainbat auzotan bide-zorua konpontzeko beste kanpaina batera
- Obrak 2026ko udan egingo dira, eta batez ere Lakua, Santsomendi, Arriaga eta Zabalgunea auzoetan
Tokiko Gobernu Batzordeak hiriko hainbat puntutan bide-zorua konpontzeko eta adabakiak jartzeko beste kanpaina baterako kontratazio-espedientea onartu du. Espazio Publikoaren eta Auzoen Sailak bultzatutako jarduketak 250.000 euroko inbertsioa du, eta Lakua, Santsomendi, Arriaga eta Zabalgunea auzoetako dozena bat kaletan zoladura hobetzeko aukera emango du.
Obrak 2026ko udan egingo dira eta gutxi gorabehera hilabete bateko iraupena izango dute. Galtzadako zatirik hondatuenak konpontzea izango dute helburu, ibilgailuen, oinezkoen eta txirrindularien segurtasuna eta erosotasuna hobetuz.
“Beharrezko esku-hartzea da hiriko bide-sarea egoera onean mantentzeko”, azaldu du Beatriz Artolazabal Espazio Publikoaren zinegotziak. “Urtero adabakiak jartzeko kanpaina hauek egiten ditugu, bide-zoruak higadura handiena duen lekuetan bizkor esku hartzeko. Auzoen segurtasunean eta bizi-kalitatean egindako zuzeneko inbertsioa da”, azpimarratu du.
Jarduketa gehienak Lakuan egingo dira eta 1.500 metro koadro baino gehiagoko azalera konponduko dute. Auzo horretan, Zaia ibaiaren eta Urederra ibaiaren kaleetan, Landaberde kalean, Aralar Mendiaren kalean, Baiona kalean eta Wellingtongo Dukearen kaleko biribilgunean egingo dituzte lanak. Hain zuzen ere, ibilgailuen zirkulazio handieneko eremuak dira, eta asfaltoaren higadura handiena ere hor gertatzen da.
Arriagan, lan gehienak Zadorra hiribidean, Luis Olariagan eta Wellingtongo Dukearen kalean egingo dituzte. Lan horien azalera 1.400 metro koadro ingurukoa izango da. Santsomendin ere egingo dituzte lanak, eta Antonio Machado kaleko hainbat tartetara iritsiko dira. Guztira, bide-zoruaren 800 metro baino gehiago berrituko dira.
Azkenik, Zabalgunean, lanak Olagibel kalean egingo dira, errodadura-geruza berritzeko, itsaspena hobetzeko eta zoruaren deformazio txikiak kentzeko.
“Kanpaina honek indartu egiten du Udalak hirian mantentze-lanak etengabe egitearekiko duen konpromisoa, eta lan horrek plangintza, inbertsioa eta zerbitzuen arteko koordinazioa eskatzen du, batez ere Trafikoaren Zerbitzuarekin”, gaineratu du Artolazabalek.
