Gasteizen egingo da Ciudades que Caminan Sarearen XIII. Kongresua 2026an
- Gasteiz aukeratu izanak espazio publikoa pertsonei itzultzeko eta mugikortasun atseginagoa sustatzeko hamarkada luzez egindako lana aitortzen du
Beatriz Artolazabalen adierazpenak (mp3)
Ciudades que Caminan Sareak iragarri du Vitoria-Gasteiz izango dela 2026ko urriaren bigarren hamabostaldian egingo den Sarearen XIII. Kongresuaren egoitza. Izendapen horrek Arabako hiriburuaren lidergoa aitortzen du oinezkoen mugikortasunarekin, hiri-jasangarritasunarekin eta espazio publikoa berreskuratzearekin lotuta.
Erabakia Sarearen XII. Kongresuan hartu zen, La Línea de la Concepciónen (Cádiz). Beatriz Artolazabal Espazio Publikoaren eta Auzoen zinegotzia pozik agertu da hurrengo anfitrioia izateko Gasteiz aukeratu dutelako. “Harro egoteko modukoa da Ciudades que Caminan Sareak hurrengo biltzarra hartzeko Gasteizen konfiantza jarri izana. Aintzatespen horrek hiri atseginagoa, seguruagoa eta pertsona guztientzako irisgarriagoa eraikitzeko egiten ari garen lana bermatzen du”.
Artolazabalek, gainera, azpimarratu du kongresua aukera ona izango dela Gasteizko esperientzia beste hiri batzuekin partekatzeko. “Gasteiz, gaur egun, erreferentzia da mugikortasun jasangarriari dagokionez, eta topaketa hori ikasten jarraitzeko eta espazio publikoa bizikidetzarako, osasunerako eta ongizaterako leku gisa eraldatzeko baliagarria izatea nahi dugu”.
Zinegotziak gogorarazi du Gasteizek espazio publikoa pertsonei itzultzearen alde egindako apustua aspaldikoa dela; izan ere, “70eko hamarkadaz geroztik, gure hiriak ideia argi batekin egin du lan: kaleak bizitzeko lekua izan behar du. 1976an, Dato kalea oinezkoentzako kale bihurtu zen; 1983an, Erdi Aroko Hirigunean gauza bera egin genuen; eta hamar urte geroago, oinezkoentzako hogei kale genituen, 40.000 metro karraturekin. Gaur egun, oinezkoentzako guneak, espaloiak zenbatu gabe, milioi eta erdi metro koadro hartzen ditu”.
Gasteiz Ciudades que Caminan Sareko kide da 2013tik, eta bi aldiz saritu dute oinezkoentzako politikengatik, azkena 2024an, hiriaren erdigunean espazio publikoaren 23.000 metro koadro baino gehiago berreskuratu izanagatik.
XIII. Kongresuak hiri-mugikortasunaren, irisgarritasunaren eta osasun publikoaren arloko udaletako arduradunak, adituak eta erakundeak bilduko ditu. Hitzordu garrantzitsua izango da pertsonentzat pentsatutako eta jasangarritasunarekin konprometitutako hiri-ikuspegia bultzatzen jarraitzeko.
