Gasteizek bat egingo du Arreta Defizita eta Hiperaktibitatea duten Pertsonen Egunarekin
- Hori dela eta, udaletxea laranja kolorez argiztatuko da.
Bihar astelehena, urriak 27, Arreta Defizita eta Hiperaktibitatea duten Pertsonen Eguna ospatuko da. Gasteizko Udalak bat egingo du ekitaldiarekin, eta laranja kolorez argiztatuko du udaletxeko fatxada.
Arreta defizitaren eta hiperaktibitatearen nahasmendua (TDHA gaztelaniazko sigletan) haurtzaroan agertzen da; arretarik eza, hiperaktibitatea eta inpultsibotasuna ezaugarri dituen nahasmendua da. Nahasmendu hori duten pertsonek zailtasunak izan ohi dituzte ahalegina eskatzen duten zereginetan kontzentratzeko, erraz galtzen dute arreta, eta arazoak dituzte geldi egoteko. Hori guztia dela eta, eragindako pertsonen eguneroko jarduerak oztopatzen ditu patologia horrek.
Arreta eza eta hiperaktibitatea duten haur eta helduen elkarteak (ANADAHI) baliabideak sustatu nahi ditu eragindakoen garapen bio-psiko-soziala bermatzeko eta haien eguneroko bizimodua zein haien familiena hobetzeko, baita gizarte-eragileak nahasmendu psikopatologiko horretaz eta helduaroan dituen ondorioez sentsibilizatzeko ere.
