Gasteizek 7,3 milioi euro jaso ditu Erdi Aroko Hiriguneko Ekintza Integraleko Planeko ekintzak garatzeko
- Dokumentuak 26 jarduera aurreikusten ditu, hala nola eraginkortasun energetikoa hobetzea, birgaitzea, lokalak dinamizatzea edo Hirigune Historikoa naturalizatzea
- Aldabe gizarte-etxea “eraginkortasun energetikoko estandarren araberako espazio multifuntzional bihurtuko da”, azaldu du Maider Etxebarriak
Vitoria-Gasteizek 7,3 milioi euro jasoko ditu Erdi Aroko Hiriguneko Ekintza Integraleko Planean aurreikusitako ekintzak gauzatzeko eta garatzeko, Espainiako Gobernuko lehen presidenteordetzak eta Ogasun Ministerioak argitaratutako behin-behineko ebazpenaren arabera.
Ekarpen ekonomiko hori Eskualde Garapeneko Europako Funtsetatik dator, eta funts horien bidez finantzatuko dira Ekonomia Sustapenaren Sailak teknikariek aztertzeko eta berrikusteko bidalitako Ekintza Integraleko Planaren dokumentuan jasotako ekintza gehienak.
“Ekintza Integraleko Planak 26 jarduera biltzen ditu guztira eta horien aurrekontua 18 milioi euro baino zertxobait gehiagokoa da, eta horietarako eskatu ditugu Europako laguntza hauek. Asmo handiko proposamena da, Hirigune Historikoa eta Koroatze auzoko atal bat eraldatzeko helburua duena”, iragarri du Maider Etxebarria Gasteizko alkateak.
Proiektuen zerrenda horretan jasota daude “energia-eraginkortasuna hobetzeko jarduerak, birgaitzea, etxebizitza, erabilgarri dauden merkataritza-lokalak dinamizatzea, Maturana Berastegi Jauregia eraberritzea, Erdi Aroko hirigunea naturalizatzea edo Aldabe gizarte-etxea eraberritzea”.
Hain zuzen ere, azken ekintza hori da asmo gehien bateratzen dituena. Izan ere, Aldabe Hirigune Historikoko eta gertu dagoen Koroatze auzoko bizitzarako funtsezko elementua eta ekipamendu zaharrenetako bat da.
“Helburua berritzea da, espazio multifuntzional bihurtzeko, eraginkortasun energetikoko estandar altuen baitan. 2 fase izango lituzke, eta horietako lehena, plan honi atxikita dagoena, eraikinaren eremu sozialean zentratuko da”, azaldu du Etxebarriak.
