Noticias del País Vasco

Elikaduraren XVIII. Gizarte Topaketa egingo da Gasteizen urriaren 21etik 31ra

  • Ingurumen Gaietarako Ikastegiak bisitak, proiekzioak, aurkezpenak eta prestakuntza-jardunaldiak barne hartzen dituen programa antolatu du

 

Elikaduraren Gizarte Topaketa 2025eko urriaren 21etik 31ra itzuliko da Vitoria-Gasteizera, Ingurumen Gaietarako Ikastegiaren (IGI) eskutik. 18. edizio honetako programazioa herritar guztiei irekita egongo da eta nekazaritza ekologikoan, nekazaritza birsortzailean eta tokiko elikadura-sarea indartzen duten ekoizpen- eta kontsumo-eredu berrietan jarriko du arreta.

“Edizio berri honekin, Elikaduraren Gizarte Topaketa erreferente bihurtu da Euskadin trantsizio agroekologikoa eta elikadura-subiranotasuna bultzatzeko prozesuan. Jarduera horien bidez, Gasteizek landa- eta hiri-inguruneko berrikuntzako laborategi bizi gisa duen konpromisoa indartuko du, herritarren, ekoizleen eta erakundeen arteko lankidetza sustatuz bidezkoagoa, erresilienteagoa eta jasangarriagoa den elikadura mailako etorkizunerantz aurrera egiteko”, adierazi du Borja Rodríguez Gasteizko Ingurumen zinegotziak.

Bisitak, proiekzioak, aurkezpenak eta prestakuntza-jardunaldiak egingo dira Gasteizen, lehen sektoreko profesionalei zein publiko orokorrari zuzenduta, lurrarekin, komunitatearekin eta elikadura-subiranotasunaren balioekin berriz konektatzeko ahaleginean.

Programa urriaren 21ean, asteartean, hasiko da, ALEKO Nekazaritzako Test Guneko Monasteriogureneko lursailetara antolatutako bisitarekin. Ekimen aitzindaria da, lehen sektorean hasi nahi duten pertsonei prestakuntza-ibilbidea eta lurrak eskaintzen dizkiena. Gune horretan, nekazaritza birsortzailearen eredu desberdinetara bideratutako nekazaritzarako lursailak daude, baratzezaintza eta frutagintzatik hasi eta laborantza estentsiboetara, basogintzara eta abeltzaintza birsortzailera arte. Bisita 11:00etatik 13:00etara egingo da Monasteriogurenen, eta Gasteizko landa-ingurunean ekoizpen jasangarriko modu berriak nola entseatzen ari diren bertatik bertara ezagutzeko aukera emango du.

Egun horretan bertan, arratsaldean, ‘Huertopías’ liburuaren aurkezpena egingo da Landatxo gizarte-etxean, José Luis Casadevante ‘Kois’ liburuaren egilearen eskutik. Liburuak egungo krisi ekosozialaren aurrean gizartea, ingurumena eta kultura eraldatzeko tresna gisa hiriko nekazaritzak betetzen duen rolari buruzko hausnarketa egiten du, eta baliabide eta energia gutxiagoko etorkizuna irudikatzera gonbidatzen du, baina komunitate kohesionatu eta erresilienteagoekin. ‘Huertopías liburuak komunitate-baratzeak, hiri-etxaldeak, baso jangarriak, hiri-mahastiak edo ospitaleetan abian jarritako baratze-terapiak moduko esperientzia inspiratzaileak jasotzen ditu besteak beste. Adibide horiek nekazaritzak espazio publikoak berdatu eta kultura-aldaketa sakonak eragin ditzakeela erakusten dute.

Urriaren 24an, ostiralean, Olarizuko Lorategi Botanikoko Etxaldea zinema agroekologikoko saioaren topagune bihurtuko da. Hainbat dokumental proiektatuko dira eta tokiko nekazariekin mahai-ingurua egingo da. Ekitaldian, gainera, ekoizleek beraiek egindako produktuak dastatuko dira, eta udazkeneko eta neguko haziak banatuko dira, Euskadiko Hazien Sarearekin lankidetzan, hausnarketa, dastatzea eta ezagutzen trukea uztartuko dituen giro parte-hartzailean.

 

Jardunaldi nagusia Basaldean

Programazioak urriaren 25ean, larunbatean, jarraituko du Basaldea nekazaritza ekologikoko enpresen zentroan egindako ate irekien jardunaldiarekin. Bertan, tokiko produktuen merkatua, hazitegiaren proiektuetara egindako bisita gidatuak, animalien trakzioarekin egindako laborantza-erakustaldiak, haurrentzako jarduerak eta baratzezaintza birsortze biointentsiboko erakustaldia egingo dira Soilik kooperatibarekin. Goizari amaiera emateko, Slow Food Arabarekin elkarlanean, Basaldeko produktuak dastatuko dira, musikarekin girotuta, tokiko nekazaritza ekologikoaren sistemaren bizitasuna eta herritarrekin duen lotura ospatzea helburu izango duen jai-giroko hitzordu horretan.

Topaketari amaiera emateko, ‘Lurraldearen kudeaketa agroekologikoa’ ikastaroa egingo da urriaren 27tik 31ra Olarizuko Lorategi Botanikoko Etxaldean. Lehen sektoreko ekintzaileei zuzenduta egongo da eta ikastaroaren helburua da kudeaketa agroekologikoko eredu berritzaileak ezagutaraztea eta nekazaritza birsortzailearekin, agroekologiarekin eta ekonomia sozial eta solidarioarekin lotutako tekniketan trebatzea. Prestakuntza horren bidez, belaunaldi berriak nekazaritzaren sektorean sartzera bultzatu eta landa-ingurunea ikuspegi sozial eta ekologiko batetik indartuko duten proiektu jasangarriak sustatu nahi dira.

 

 

 

 

Share

Publicaciones relacionadas

Deja una respuesta

Tu dirección de correo electrónico no será publicada. Los campos obligatorios están marcados con *

Botón volver arriba

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies