Bide berde berri bat Zadorra ibaiaren ibilguarekiko paraleloan igaroko da Gamarran
- 973 metroko luzera izango du, Gamarrara sartzeko errepideko zubiaren eta garai bateko Vasco-Navarro Trenbidearen Bide Berdea artean
- Lizarrarako irteera zaharra oinezkoentzako eta bizikletentzako bide bihurtu da, eta Eraztun Berdearen konexioetan txertatuko da
Tokiko Gobernu Batzordeak espedientea hasi du Zadorra ibaiaren ibilguarekiko paraleloan bide berde berria sortzeko, Gamarrako igerilekuen parean. Horri esker, gainera, Eraztun Berdea osatzen duten ibilbideen sarearen konexioa hobetu ahal izango da.
“Gamarrako Bide Berdea Zadorra ibaiaren ingurumen-susperraldian aurrera egitea eta Vitoria-Gasteizko mugikortasun jasangarriaren sarea hobetzea ahalbidetuko duen jarduketa da. Horri esker, herritarrek bide horretaz gozatzea eta gure natura-ondarearen kontserbazioa bultzatu ahal izango dugu”, azaldu du Maider Etxebarria Gasteizko alkateak.
Bide berriak 973 metro izango ditu, garai bateko Vasco-Navarro trenbideko Bide Berdearen eta N-240 errepidearen zubiaren artean, Gamarrako herriaren sarreran. Oinezkoentzat eta bizikletentzat izango da, 3 metroko zabalera izango du eta ingurune naturalean integratuta egongo da.
Gamarrako parkearen ondotik igaroko denez, igerilekuen eta bidezidorraren erabiltzaileen arteko pribatutasuna babesteko, 2 metroko altuera izango duen hesia jartzea aurreikusten da. Horrez gain, “2 metroko zabalerako zerrenda berdea jarriko da, espezie autoktonoekin, inguruneko biodibertsitatea indartzeko eta barrera natural gisa funtzionatzeko”.
Jarduketa horrek igerilekuen esparruan dauden azpiegituren berrantolaketa partziala ekarriko du berekin, hala nola ureztatze automatikoko sarea eta zenbait jolas-espazio. “Proiektuak erabilerak bateragarriak izango direla bermatzen du. Hala, piknik-eremuak, ontziralekua eta bolatokia mantenduko dira, eta eragina jasango duten altzarien zati bat birjarriko da”.
Proiektua gauzatzeko aurrekontua 199.218,62 eurokoa da (BEZa barne). Behin esleituta, obrak egiteko epea 5 hilabetekoa izango da.
Lizarrarako irteera zaharra
Bestalde, N-132 errepide zaharra oinezkoentzako eta bizikletentzako bide bihurtu da, ibilgailu motordunekin istripuak izateko arriskua murrizteko.
Elorriaga eta Santo Tomas ibaiaren gaineko zubiaren arteko 332 metroko tarte hori Lizarrarako (Nafarroa) noranzkoan hiriko irteeretako bat izan zen, eta esku-hartze honen bidez, Eraztun Berdeko buelta osatuko duten ibilbideen sarean txertatuko da.
Galtzada 3 metroko zabalera duen plataforma bihurtu da, oinezkoak eta bizikletak ibiltzeko.
Bestalde, zerrenda berde bat sortu da hainbat zuhaitz espezie eta landaketa mota hartzeko, eta 2 metroko zabalerako eremu bat mantenduko da nekazaritzako makinak eta zerbitzuetako ibilgailuak igarotzeko.
