Arabaclickek bere ediziorik anbiziotsuena beteko du, 30 artistaren argazkiak ikusgai 10 aretotan
- Herri Argazkigintzaren VII. Topaketak bekak, sariak eta urriaren 31n Vital Fundazioa Kulturunean egingo den gala bat dakartza
- Erakusketak azaroaren 30era arte izango dira areto nagusietan
Arabako kultura eta arte areto nagusietako hamarrek hartuko dituzte azaroaren 30era arte ArabaClick Herri Argazkigintzaren VII. Topaketako banakako eta taldeko herri argazkien erakusketak. Revelare Kolektiboak eta Vital Fundazioak antolatu dute jaialdia, Arabako Foru Aldundiaren, Gasteizko Udalaren eta Jardín Remoto Arabako argazkigintza eskolaren laguntzarekin.
Lorena López de Lacalle Revelare Kolektiboko presidenteak, ArabaClickeko zuzendari artistikoak, Gustavo Bravo Jardín Remotoko zuzendariak, Arantxa Ibañez de Opacua Vital Fundazioko zuzendariak, Ana del Val Kultura eta Kirol foru diputatuak eta Sonia Díaz de Corcuera Gasteizko Udaleko Kultura eta Hezkuntza zinegotziak aurkeztu dute ekitaldia gaur Vital Fundazioa Kulturunean.
Edizio honetako nobedadeen artean, ikusgai dauden argazki guztiak Araban egin dira, eta erakusketa-guneak hamar izatera arte zabaldu dira. Horretarako, lehen aldiz erabiliko dira lurraldeko hiru artxiboak (udalekoa, probintziakoak eta Sancho el Sabio Vital Fundaziokoa), EHUko hiru areto eta Arte prestakuntza zentroak, hala nola IDarte eta Federico Baraibar, lehen erabiltzen ziren Ataria eta LABEkoez gain (gazteen kategoriarako). 3.000 argazki inguru jaso dira edizio honetan (2024koaren bikoitza baino gehiago).
Era berean, formatu eta panoramika handiko proposamenen aldeko apustua egin da, parte-hartzaileei askatasun osoa eta estandar goreneko kalitateak emanez, ondoren lurraldean zehar txandakatzea bermatzeko. Era berean, aurten, Revelare Saria emango da lehen aldiz, lurralde argazkigintzan arrastoa utzi duen arabar pertsona esanguratsu bati egingo zaion aitortza.
Emakumeen zigilua duen argazkigintza
ArabaClick 2025eko hamar erakusketetan banakako lau serie daude (emakumezko hiru argazkilari eta gizonezko argazkilari bat) eta taldeko sei erakusketa, 37 argazkilarik hartuko dute parte eta horietatik 24 emakumeak dira. Gazteen kategoriari eskainitako erakusketan ere, lanak ikusgai dituzten hamar artistetatik zortzi emakumeak dira.
Sariak eta bekak banatzeko gala
Urriaren 31n, 18:00etan, Vital Fundazioa Kulturunean (Bakea kale 5, Dendarabako 1. solairua) erakusketak aurkezteko gala egingo da. Bertan iragarriko da zeintzuk diren sei prestakuntza-bekak merezi dituzten lanak (bost beka eta superbeka bat, proiektuaren zuzendaritza eta ArabaClick 2026 erakusketan parte hartzeko aukera barne), baita diru zuzkidura irabazi duten sei gazte sarituen izenak ere. Halaber, ‘Revelare Saria’ jasoko duen pertsonaren izena iragarriko da. Sari hori lehen aldiz emango da, bizitza argazkigintzari eskaini dioten arabarren ibilbidea omentzeko.
Ekitaldian, 2024ko Super Bekaren irabazleak, Adirane Azkuenagak, beka horri esker egindako lana aurkeztuko du. Izan ere, beka hori lortzen duen pertsonak egile-argazkigintzari buruzko urtebeteko prestakuntza eskuratzen du Jardín Remoto el Metaverso de la Fotografía delakoan, Gustavo Bravoren tutoretzapean, eta bere obra erakutsi ahal izateko baliabideak ere bai.
Arabaclickek Vital Fundazioaren bultzada nagusia du, eta Arabako Foru Aldundiaren eta Gasteizko Udalaren babesa, baita beste laguntzaile pribatu eta publiko batzuena ere, hala nola FotoGasteiz, Jardín Remoto, EHU, IDarte eta Federico Baraibar.
