O cronobiólogo Juan Antonio Madrid e a astrofísica Eva Villaver, protagonistas da segunda parte do V Encontro da Noite, que se desenvolverá este sábado 30 na Domus
Cando:
29 de novembro de 2024
A Domus, nunha imaxe de arquivo
A Agrupación Astronómica Coruñesa Ío organiza o evento, que conta coa colaboración do Concello e será de acceso libre ata completar a capacidade prevista
A Domus acolle este sábado 30 a segunda parte do V Encontro da Noite, unha iniciativa organizada pola Agrupación Astronómica Coruñesa Ío que contará coa participación do cronobiólogo Juan Antonio Madrid, profesor da Universidade de Murcia, e da astrofísica Eva Villaver, subdirectora do Instituto de Astrofísica de Canarias.
A xornada, que arrancará ás 18.00 horas, comezará coa palestra ‘Ritmos biológicos en un mundo sin noche’, na que Madrid abundará na incidencia que teñen tanto a luz como a escuridade na fisioloxía e a saúde humana.
Xa a continuación, a partir das 19.00 horas, Eva Villaver protagonizará a charla ‘Escrito en las estrellas’, que lles permitirá ás e aos asistentes entender a fascinación do ser humano polo ceo nocturno, achegando tamén nocións do coñecemento que achega a súa observación.
Esta segunda parte do Encontro da Noite completa a programación prevista de cara a esta quinta edición, que arrancou o pasado 5 de outubro e chega agora á súa conclusión. O concelleiro de Cultura e Turismo, Gonzalo Castro, convidou a cidadanía a asistir aos actos de peche, que terán lugar na sala Leonardo da Vinci e serán de acceso libre ata completar a capacidade prevista.
O evento, promovido pola Agrupación Astronómica Coruñesa Ío, conta coa colaboración do Concello a través da rede municipal de Museos Científicos Coruñeses.
