O Concello da Coruña selecciona as fotografías que ilustran o calendario municipal do 2025
Cando:
30 de novembro de 2024
O Concello da Coruña selecciona as fotografías que ilustran o calendario municipal do 2025
Alberto Pereiras Pena pecha con esta imaxe o calendario municipal do 2025
O almanaque, que se distribuirá desde decembro, estará encabezado por unha frase de Manuel Rivas, Premio Nacional das Letras 2024
O Concello da Coruña seleccionou as 13 imaxes que formarán parte do calendario municipal do 2025. O xurado reuniuse nas últimas semanas para analizar as diferentes propostas achegadas para esta edición, cumprindo coa tradición de editar un almanaque formado por imaxes de fotógrafos afeccionados da cidade. O calendario distribuirase desde o mes de decembro en quioscos.
Este concurso está, como cada ano, aberto á participación cidadá e as fotografías deben tomarse no termo municipal da Coruña. Nas imaxes é necesario destacar o patrimonio cultural, histórico, natural e paisaxístico da cidade. O xurado tivo en conta a calidade técnica e a orixinalidade da imaxe.
O xurado estivo formado polos fotoxornalistas César Quián, Víctor Echave e Pedro Puig. Tamén estivo integrado por Andy Pérez, responsable de fotografía do Concello. A alcaldesa, Inés Rey, e os membros da corporación Nereida Canosa, Roberto Coira e Francisco Jorquera, tamén formaron parte do xurado. Xunto ás 13 imaxes seleccionadas (12 para os meses do ano e unha para a portada), o almanaque completarase con fotografías históricas da cidade do Arquivo Municipal da Coruña para cada un dos meses do ano.
Este ano, o calendario irá encabezado pola frase ‘Cidade habitada polo vento’, referencia extraída da obra Os libros arden mal (2006) de Manuel Rivas, Premio Nacional das Letras 2024. As persoas gañadoras recibirán dous libros de fotografía e un ano de acceso gratuíto aos Museos Científicos Coruñeses para dúas persoas.
As gañadores e gañadores do concurso
- Portada: Marcos Queiro.
- Xaneiro: Soraya Sampedro Bores.
- Febreiro: Javier Castelo.
- Marzo: Daniel Martí.
- Abril: Marcos Gestal.
- Maio: Chencho Mendoza.
- Xuño: Eduardo Mosqueira Rey.
- Xullo: Mónica Rial Dosil.
- Agosto: Alberto Quijada Loures.
- Setembro: Luis Cagiao Rodríguez.
- Outubro: Ana Fernández.
- Novembro: Manuel Candal.
- Decembro: Alberto Pereiras Pena.
