O Concello comeza os traballos de renovación do campo número 1 da Cidade Deportiva Arsenio Iglesias

O Concello da Coruña inicia esta semana as obras de reforma do campo de fútbol número 1 da Cidade Deportiva da Torre – Arsenio iglesias. Deste xeito, o Goberno de Inés Rey completará a substitución de todos os terreos de xogo, con máis de 20.000 metros cadrados de céspede artificial renovados e un investimento de case 1,4 millóns de euros.

«O compromiso da nosa alcaldesa con dotar á cidade de instalacións deportivas de primeiro nivel amósase con actuacións coma esta, que renova por completo a cidade deportiva que máis usuarios acolle», indicou Manuel Vázquez, concelleiro de Deporte. Neste caso, os traballos centraranse na renovación integral da superficie, a mellora da instalación de rega e a substitución do equipamento asociado, como porterías e bancos. O orzamento deste proxecto é de 419.000 euros, IVE incluído, e os traballos desenvolveranse ao longo de oito semanas. O campo pasará a estar homologado pola normativa oficial das federacións deportivas de fútbol e jockey, o que permitirá realizar encontros oficiais de ambos deportes.

Esta actuación forma parte do plan de mellora da Cidade Deportiva da Torre – Arsenio Iglesias, que inclúe diferentes actuacións relevantes como a substitución das varandas. O Goberno de Inés Rey busca con estas actuacións mellorar a experiencia das persoas usuarias dunha das instalacións deportivas máis completas de Galicia, que conta tamén cunha renovada iluminación led en todos os seus campos. 

«A Cidade Deportiva da Torre – Arsenio Iglesias é usada cada semana por miles de persoas e a nosa alcaldesa, nestes cinco anos desde a súa chegada ao Goberno municipal, busca o benestar de deportistas e asistentes, atendendo demandas históricas como a apertura dunha cafetería nas instalacións», sinalou Manuel Vázquez.