O Concello adxudica a segunda fase de renovación do sistema de climatización na Fundación Luís Seoane
Cando:
27 de novembro de 2024
O Concello afrontará agora a segunda fase de renovación do sistema de climatización na Fundación Luís Seoane
A empresa Seranco será a encargada de executar os traballos, tal e como se expuxo hoxe na Xunta de Goberno Local
Este mércores, a Xunta de Goberno Local aprobou a adxudicación das obras correspondentes á segunda fase de renovación do sistema de climatización e illamento da Fundación Luís Seoane, que permitirán solventar o problemas de filtracións que hai no inmoble desde hai máis dunha década.
«O Goberno de Inés Rey comprometeuse a solucionar isto de xeito definitivo. Por iso, é necesaria a posta en marcha desta segunda fase de renovación do sistema de climatización, clave para o correcto funcionamento do mesmo», indicou o voceiro do Goberno municipal, José Manuel Lage, que apuntou que será a empresa Seranco a que executará os traballos desta segunda fase.
Ademais, tamén se adxudicou o novo contrato para o control de aves no termo municipal, que asumirá a empresa Larus Control ata o ano 2026, cun orzamento de 300.000 euros ata a conclusión do servizo.
En paralelo, aprobouse a continuidade do contrato de conservación, mantemento e reparación das fontes ornamentais e estanques do Concello, asumido desde o ano 2020 pola empresa Socamex. Os pregos do contrato establecían a posibilidade de manter este vínculo por varios anos máis, e como máximo ata decembro de 2025. O investimento previsto ata entón é de medio millón.
A maiores, tamén se lle dará continuidade un ano máis ao servizo de conservación e mantemento dos xacementos arqueolóxicos do Concello, que inclúen, entre outros enclaves patrimoniais, á Torre de Hércules e o Castro de Elviña. Destinaranse case 150.000 euros de investimento a este servizo ata finais do ano que vén.
