Comeza o plan de melloras previsto polo Concello coa reforma do parque infantil Carlos Casares

O Concello dalle un novo pulo ao plan integral de mellora dos parques infantís da cidade, unha iniciativa impulsada polo Goberno de Inés Rey co obxectivo de adecuar as infraestruturas de xogo en termos de accesibilidade e seguridade, atendendo ás necesidades detectadas en cada unha delas.

Se no último mes se acometeu a substitución do pavimento na área de xogos infantís de Monelos, agora é o turno do parque infantil Carlos Casares, situado entre o sector norte do barrio de Monte Alto e a contorna da Torre de Hércules, e que, pola súa localización, máis exposto á fachada marítima, esixe tarefas de mantemento máis frecuentes tanto dos espazos de xogo como do mobiliario urbano alí habilitado.

Neste sentido, a Concellaría de Infraestruturas e Mobilidade iniciou as actuacións no parque infantil esta semana, cunha folla de ruta que inclúe, en primeira instancia, a instalación de novos elementos de xogo. Concretamente, unha torre dobre con tobogáns, con capacidade para 20 persoas usuarias, en idade de 2 a 8 anos. Xa a posteriori levarase a cabo a substitución do firme de caucho, que será renovado por completo. 

Trátase dunha intervención na que o Concello levará a cabo un investimento de algo máis de 41.000 euros «para seguir avanzando no cumprimento dun dos principais compromisos asumidos polo Goberno de Inés Rey: mellorar a calidade dos espazos públicos da cidade e que estean abertos a toda a cidadanía».